Vestnes kommune og nynorsken

Frå kommunedirektøren si innstilling kan ein lese at den politiske leiinga og kommuneadministrasjonen har ønska ei sak der det blir vurdert om kommunen skal bli språknøytral. Det er grunngjeve med ønske om valfriheit for dei tilsette. Det kan høyrest omtenksamt ut, men samtidig undrar vi oss over når og korleis den politiske leiinga og kommuneadministrasjonen mottok dette ønsket. Har ein opplevd stor pågang frå tilsette i Vestnes kommune i saka? Har dette vore uttrykt i lang tid? Alle tilsette i Vestnes kommune har søkt på og takka ja til ein jobb i ein nynorskkommune, og bør med andre ord ha vore innstilte på å bruke nynorsk i arbeidslivet. Er omsorga for dei tilsette eit vikarierande argument?

Grunnskulane skal halde fram med den målforma dei har, les vi vidare i innstillinga. Om lag 95 % av elevane i kommunen brukar nynorsk. Det er heilt naturleg med tanke på dialektane i Vestnes. Likevel, det er ei kjent sak at nynorsk også treng drahjelp, og som i alle andre saker er vaksne sin praksis medverkande til dei unge sitt syn. Har ikkje alle tilsette i kommunen ein viktig og forpliktande rolle å ta her? Gode språkmodellar kan ein ikkje få for mange av. Eller seier vi til elevane våre at nynorsk høyrer til i grunnskulen – i arbeidslivet velgjer vi det vekk?

Vi veit at kommunen skal spare der ein kan, og sparing er eit argument det kan vere vanskeleg å seie imot. Derfor skulle vi gjerne sett tal som viser kor mykje kommunen vil spare på å bli språknøytral. Eller er det kun å spare den årlege kontingenten på 22.403 kroner til Landssamanslutninga for nynorskkommunar (LNK) som fristar? Det kunne også vore interessant å vite i kva grad kommunen til no har nytta seg av den hjelpa ein kan få via LNK. Om ein snur på det – dersom ein vil arbeide med og for eit godt nynorsk, kan ein ikkje heller ta imot all støtte og utbytte ein kan få av denne medlemskapen?

Kor viktig er det for den gjennomsnittlege vestnesingen at kommunen er språknøytral? Ser vi verdien av at kommunen held fram som nynorskkommune? Er innstillinga frå leiinga kjent for dei fleste? Om svaret her er nei, er vi i alle fall lette offer for innføring av språknøytral og på sikt snikinnføring av bokmålsk kommune.

Vi undrar oss over bakgrunnen for at språknøytralitet har vorte viktig no, og saknar eit kunnskapsgrunnlag til saka. Kor gjennomtenkt er innstillinga? Mållaget fryktar at konsekvensen blir at nynorsk taper terreng, først i kommunal handsaming, vidare i skulane.

Om ikkje vi støttar kampen for nynorsk, kan vi då vente at andre vil? Bør ikkje vi i Vestnes stå opp for skriftspråket som er så nært talemålet vårt?

Vestnes Mållag ved:
Britt Elise Skram
Lars Helge Eidhamar
Kathrin Villa
Petter Inge Bergheim
Asbjørn Oterhals
Knut Romestrand
Edvard Langset