Borgarleg kaos: Fantasipengar og skulestruktur

Sidan i fjor har Høgre, Frp og støttehjula Venstre og Krf kutta 90 årsverk ute i skulane. 90 lærarar, miljøarbeidarar og andre i laget rundt eleven. Det har allereie fått store konsekvensar, som til dømes elevar som i kortare og lengre periodar har vore utan lærar og utan vikar. Det ligg ikkje pengar i deira budsjett for å demme opp for dette.

Senterpartiet føreslo å styrke vidaregåande opplæring med 30 millionar kroner neste år. Det skulle vere ein start på ei stor satsing på barn og unge og desentralisert utdanning, men vi vart nedstemt i fylkestinget.

Det var også forslag i fylkestinget om å slå saman Stranda med Sykkylven vidaregåande, og å leggje ned Tingvoll vidaregåande skule. Det er eit særs uklokt forslag. Eg var sjølv elev på Tingvoll for tre år sidan, og det gjekk bra med meg! Sjølv om Høgre altså er livredde for små skular. Både Stranda og Tingvoll har over tid skåra godt både på fullføring og faglege resultat. Senterpartiet vil ikkje vere med på å leggje ned nokon vidaregåande skular, og eg er glad for at posisjonen heller ikkje ynskjer dette no. Likevel er eg bekymra for at vi også neste år må kjempe for å oppretthalde skulestrukturen og distriktsskulane.

Senterpartiet vil sikre desentraliserte vidaregåande skular. Skulane er ikkje berre læringsarenaer; dei er hjartet i lokalsamfunna våre, og bidreg til at færre unge må flytte heimefrå som 15-åringar.

I tillegg styrkjer Senterpartiet tilrettelagt transport med 3 millionar kroner årleg. Det er heilt naudsynt for å sikre at menneske med funksjonsnedsetting får moglegheit til å delta i kvardagslivet.

Vi ynskjer også å bevare desentraliserte tannhelseklinikkar i Stranda, Midsund, Eide og Averøy. Gruppene som har rett til behandling i den offentlege tannhelsetenesta er barn, unge, eldre og sjuke. Altså sårbare grupper som er mindre mobile enn resten av befolkninga. Det at posisjonen ikkje har vorte einige, men at Frp i siste liten kjem med eit verbalforslag med tvilsom inndekning blir useriøst – sjølv om eg er glad for at tannklinikkane vert berga i denne omgang.

I år, som i fjor er det, totalt borgarleg kaos. Eg er skuffa over eit posisjonen sitt budsjettforslag som ber preg av hastverksarbeid og bruk av fantasipengar. Dei vil bruke pengar på disposisjonsfondet og svekkje den økonomiske situasjonen vår i ei tid der vi treng trygg økonomistyring.

Posisjonen budsjetterer også med at fylkeskommunen får auka skatteinntekter på 70 millionar kroner. Dersom dette er reelt tyder det at Høgre og Frp ynskjer at vanlege folk skal få betydeleg auka skatt. Det er jo ei god klargjering før stortingsvalet, at med Høgre og Frp i regjering blir det auka skatt for vanlege folk i Møre og Romsdal.

Men trass for auka skattar har dei likevel ikkje klart å finne meir pengar til vidaregåande skule. Det er uansvarleg politikk.

Dordi Boksasp Lerum
Fylkestingsrepresentant og stortingskandidat for Senterpartiet