Avslutta festivalen med meisterkonsert

Landsfestivalen i gammaldansmusikk vil gå inn i historiebøkene som ei av dei største kulturhendingane i Vestnes. Ikkje sidan det store songarstemne på Vestnes i pinsa i 1862 har det vore samla så mykje folk i Helland-området på ein gong.

Landsfestivalen blei avslutta med meisterkonsert, der ein fullsett Vestneshall fekk høyre dei aller beste musikarane i landet i gammaldansmusikk. Dei tre beste i alle kategorier fekk presentere seg med eit nummer. Publikum fekk også oppleve dei beste utøverane i gammaldans.

Stor stemning

I hallen var det stor stemning blant dei om lag 400 publikummarane lenge før konserten starta klokka tolv. Hilde Reitan, styreleiar i FolkOrg, annonserte meisterkonserten som eit punktum for ein fantastisk festival i Vestnes. Folket i salen fekk i løpet av to og ein halv time høyre ein topp konsert av svært dyktige musikarar. Ein kunne ane at det var svært mange som trimma ankelmuskulaturen. Elles var det også teknisk sett ein vellykka gjennomført konsert. Lydteknikarane, deriblant Eline Rafteseth frå Vestnes, gjorde ein imponerande jobb med å legge til rette for alle dei ulike utøverane. Hallingdal Lyd hadde ansvaret for det som kom ut av høgtalarane og det var av aller beste kvalitet, ikkje ein ulyd vart registrert.

Lokale heltar

Leiar av festivalen, Britt Elise Skram, var med heilt til finalen der ho vart nummer fire. Ho kom såleis ikkje gjennom nålauget, det var dei tre beste i Felespel senior som kom til Meisterfinalen på søndag.

– Eg er godt fornøgd med å komme på fjerdeplass, det er stort å komme til finalen. Det er skarp konkurranse og eg ser slett ikkje på ein fjerdeplass som nederlag. Eg høyrte på dei tre beste i meisterkonserten, og der var det berre flinke folk. Blant andre Marie som kom på ein flott tredjeplass, seier Britt Elise.

Marie Skavnes, opphaveleg frå Vestnes, var blant dei tre på topp som vart nominert til meisterfinalen i fele/hardingfele senior. Her kom ho på ein flott tredjeplass. Leif Inge Schølberg vann klassen, medan Marius Westling kom på andreplass. Marie Skavnes og ektemannen Øyvind Selnes klatra nesten heilt til topps i samspel senior, dei vart nummer tre i meisterfinalen.

Spelmannslaget Dåm og Drag frå Vestnes kom på ein delt 11. plass med Snaustrinda spelmannslag i klassa lagspel fele/hardingfele. Her var det 24 deltakarlag så Vestnes hamna her om lag midt på treet. Britt Elise tok over leiinga av Dåm og Drag for anledninga og ho seier at det er lenge sidan sist dei var med i konkurransespeling. Ho synest at 11. plass var ei bra plassering, særleg sett på bakgrunn av at dei ikkje har fått øvd så mykje i lag.

Tusen takk frå leiar i FolkOrg, Hilde Reitan

Hilde Reitan var svært fornøgd med årets festival, ho retta ein varm takk til arrangørane på Vestnes og Møre og Romsdal folkemusikklag for vel utført jobb. Ho sa ho var svært glad for å komme til Vestnes, ho har aldri vore her før. Her er det veldig vakkert og eg kjem gjerne tilbake, sa ho med eit smil.

– Denne landsfestivalen er i ferd med å gå mot si avslutning og vi kan sjå tilbake på fem dagar fylt med glede og gode opplevingar. Det har vore godt gjennomførte tevlingar, tettpakka program, men alt har gått som smurt. Det har vore glitrande god dansemusikk frå morgon til seine kvelden og eit godt og variert kulturprogram. Gode mingleområder som har stimulert til mykje buskspel og trivelege møte mellom gode venner. Det har også vore godt tilrettelagte aktivitetar for barna, noko som er viktig, seier Reitan

Ho seier vidare at landsfestivalen er eit stort arrangement, det er tusenvis av detaljar som skal på plass. Ho la vekt på at landsfestivalen er heilt avhengig av frivillige dugnadsfolk som sørger for at arrangementet går knirkefritt. Utan dei frivillige hadde det rett og slett ikkje vore muleg å gjennomføre denne festivalen. Utfordringar dukker heile tida opp som må løysast med ein gong. Maken til stå-på-vilje og løysingsorientering som ein har opplevd her på Vestnes, skal ein leite lenge etter.

Så vart hovudnemnda kalla fram på scena for å ta imot velfortent hyllest.

– Det er hovudnemnda som er ansvarleg for arrangementet, det er dei som har planlagt i to år, trekt i alle trådar og styrt dette på ein framifrå måte. Dei fortener ein skikkeleg applaus, sa Reitan.

Salen kvitterte med langvarig applaus som vart avslutta med ståande trampeklapp. Følgande sat i hovudnemnda:

Britt Elise Skram, leiar, Kristina Farstad Bjørdal, nestleiar, kultur og informasjon, Anna Gjendem, tevling, Hanne Moldver Salthammer, innkvartering, Torill Steien, frivillig, Hege Haugen, frivillig, Robert Rud, økonomi, Odd Ivar Røynesmo, økonomi, Sabine Relling Bredeli, HMS, Frode Gjelstenli, mat, Øyvind Rypdal, teknisk arena, Marius Høglund, stemnekontor.

– Tusen takk for at de ville ta på dokke dette store arrangementet. Tusen takk for glimrande innsats og for at landsfestivalen 2024 er blitt ei minnerik oppleving. Tusen takk til alle de i Vestnes som så gjestfritt har opna husa og tatt så godt imot oss, sa Reitan før det blei overrekt gåver til hovudnemnda.

Leiar i hovudnemnda

Britt Elise Skram takka på vegne av Møre og Romsdal folkemusikklag og hovudnemnda FolkOrg for tilliten og at dei fekk mulegheiten til å arrangere denne festivalen.

– Vi har hatt eit godt samarbeid med FolkOrg og har fått mykje viktig hjelp og gode råd når vi har lurt på ting. Eg vil seie tusen takk til Vestnes kommune som også har vore ein god samarbeidspartnar. Det lokale næringsliv har gitt oss god støtte i form av økonomi og utlån av utstyr, som vi er takksam for. Eg vil også takke dei mange frivillige som har stått på dag og natt. Utøverar og publikum fortener også stor takk som har komme til Vestnes og deltatt med musikk og dans. Eg vil til slutt rette ein stor takk til vêrgudane som bidrog til at det blei fine dagar på Vestnes, sa Skram til humring frå publikum.

Vel blåst

Vestnesavisa har hatt kontakt med mange av dei besøkande under festivalen. Dei har berre gode ord å seie om arrangementet. Dei er blitt møtt med stor velvilje og gjestfriheit frå lokalbefolkninga, alt har vore svært godt tilrettelagt. Kanskje det blir ein ny landsfestival på Vestnes om nokre år. Oppdal har arrangert festivalen fem gonger, sist i 2017. Og neste år vil gammaldansmusikken atter ljome på Oppdal.